ЈЗУ Универзитетска клиника за респираторни заболувања кај децата „Козле“ нуди широк спектар на дијагностички и терапевтски услуги за деца со белодробни и респираторни заболувања.
Нашата мисија е брза, точна дијагноза и ефикасен третман — од амбулантски преглед до специјализирана дијагностика и болничка нега.
Клучни услуги
Сеопфатни дијагностички и терапевтски процедури за деца со респираторни заболувања.
Лекарски преглед, тријажа и обработка на амбулантски пациенти. Спроведување на перорална, парентерална и инхалациона терапија во амбулантски услови.
Прифаќање, преглед, дијагностика, следење и регулирање на хроничка терапија кај пациентите закажани преку „Мој Термин“.
Прифаќање, дијагностика, следење и спроведување на терапија на хоспитализирани пациенти.
Радиолошки снимања на главата, параназални синуси, граден кош, срце и абдоминални органи. Реализирање на ултразвучни прегледи на белите дробови и плевра, ултразвук на срце и абдоминални органи.
ОРЛ преглед, назо-фаринго-ларингофиберендоскопска евалуација, како и иследување на функцијата и состојбата на средното уво со помош на тимпанометрија. Аспирација на патолошки супстрат во ОРЛ регијата, екстирпација на туѓи тела во носна, ушна и фарингеална празнина, третман на епистакси со лапизирање и вестибуларна назална тампонада. Тоалета на усна шуплина и уши, како и апликација на медикаментозна терапија во надворешен слушен канал.
Бронхоскопска експлорација со дијагностичка и тераписка цел, вклучувајќи фиберендоскопска и ригидна бронхоскопија.
Земање на примероци за микробиолошко испитување (брис од грло, нос, коњунктива, надворешен ушен канал, рана, назофаринкс) од амбулантски пациенти. Класични бактериолошки анализи од примероци од амбулантски и хоспитализирани пациенти, со цел изолација и идентификација на причинителите на инфекција. Брзи имунохроматографски тестови за детекција на антигени (АГ) на вируси кои предизвикуваат респираторни и цревни инфекции; автоматизирани тестови на принцип на директна имунофлуоресценција (Ichroma II). Серолошки тестови на принцип на индиректна имунофлуоресценција (Pneumoslide) за детекција на IgM АТ против респираторни вируси и атипични бактерии. Тестови на амплификација на нуклеински киселини (NААТ) на бактерии предизвикувачи на атипични пневмонии (Amplex). Обработка на примероци за изолација на микобактерии.
Општи биохемиски анализи (гликоза, електролити, ензими, липиден профил, уреа, креатинин и други). Анализа на витамински и минерален статус, вклучително ниво на витамин Д. Дијагностика и следење на инфламаторни процеси и оксидативен стрес кај хронични белодробни заболувања. Серолошки алерголошки тестирања. Комплетна крвна слика со детална морфологија на еритроцити, леукоцити и тромбоцити.
Спирометриски иследувања, како и тест со бронходилататор. Мерење на фракцијата на ексхалиран азотен оксид (FeNO). Физикална терапија, кинезитерапија и процедури за земање на материјал за микробиолошки и лабораториски анализи.
Кутани (Skin prick) тестови за нутритивни и инхалаторни алергени. 24-часова pH-метрија. Спроведување на имунотерапија.
Дијагностичка полисомнографија за евалуација на нарушувања на сонот кај деца.
Mantoux (PPD5) тест.
Психолошка проценка и советување за деца и семејства.
24-часова pH-метрија со импеданса
Секоја услуга се остварува во соодветното клиничко одделение.
Закажете термин или испратете порака — нашиот тим ќе ве насочи до вистинската услуга и одделение.
